ინდოეთში, 2 წლის ბიჭუნამ, გოვინდა კუმარმა საზოგადოება გააოცა, როდესაც სამფეხა კობრა სიკვდილამდე დაკბინა
დეილი მეილი” წერს, რომ ეს გმირული ინციდენტი პარასკევ შუადღისას, ბიჰარის დასავლეთ ჩამპარანის რაიონის ბანკატვას სოფელში მოხდა, როდესაც გოვინდა საკუთარი სახლის სიახლოვეს თამაშობდა.
როგორც ნათესავები იხსენებენ, პატარამ გველი შენიშნა და ქვის ნატეხი ესროლა. საპასუხოდ, კობრა მასზე იერიში მიიტანა და ხელზე მჭიდროდ შემოეხვია. მოვლენები შოკისმომგვრელად განვითარდა – ბიჭმა გველს კბილები თავში ჩაასო და ადგილზე მოკლა.
გოვინდას ბებიამ განაცხადა: “როდესაც ბავშვის ხელში გველი დავინახეთ, ყველა მისკენ გავქანდით, მაგრამ ამასობაში მან გველს უკბინა და ადგილზევე მოკლა”.
ნაკბენიდან მცირე ხანში ბავშვმა გონება დაკარგა. ოჯახმა ის სასწრაფოდ ადგილობრივ სამედიცინო ცენტრში გადაიყვანა, მოგვიანებით კი სპეციალიზებული დახმარებისთვის ადგილობრივ სამთავრობო სამედიცინო კოლეჯის საავადმყოფოში მოათავსეს.
GMCH-ის ექიმებმა დაადასტურეს, რომ კობრა თავისა და პირის დაზიანებების შედეგად დაიღუპა, რაც, სავარაუდოდ, ბავშვის ნაკბენმა გამოიწვია.
-
ექიმების შეფასება და ბავშვის მდგომარეობა
ექიმი სურაბ კუმარი, რომელიც პატარას მკურნალობდა, აცხადებს: “შხამმა გოვინდაზე გავლენა იქონია, მაგრამ არა ფატალურად. დროულმა მკურნალობამ ბავშვის სიცოცხლე გადაარჩინა.“ მისი თქმით, ბავშვის მდგომარეობა ამჟამად სტაბილურია და მკურნალობა ექიმების მეთვალყურეობის ქვეშ მიმდინარეობს. სამედიცინო ჯგუფი უწყვეტად აძლევს მედიკამენტებს ბავშვს და ის მუდმივი დაკვირვების ქვეშ იმყოფება.
“გაგვიკვირდა როდესაც მშობლებმა მომხდარს მოგვიყვნენ. რამდენჯერმე გადავამოწმეთ ინფორმაცია, რათა დავრწმუნებულიყავით, რომ კობრას ბავშვისთვის არ უკბენია და შხამი მის სისხლში არ მოხვედრილა“, – განუცხადა ექიმმა The Telegraph-ს.
რადგან ბავშვმა კობრას ნაწილი შეჭამა, შხამი მის საჭმლის მომნელებელ ტრაქტში მოხვდა. გოვინდას ანტიალერგიული მედიკამენტი მისცეს და ახლა ექიმების მეთვალყურეობის ქვეშ რჩება.
ეს უპრეცედენტო შემთხვევაა ადგილობრივი კლინიკისთვისაც, სადაც, როგორც წესი, თვეში ხუთიდან ექვსამდე გველის ნაკბენის შემთხვევა ფიქსირდება.
